नेटिजन नेपाल
काठमाडौँ, २८ पुस। नाम राष्ट्र सेवक कर्मचारी भनिए पनि समग्रमा आम नागरिक भने उनिहरुप्रति खुलेर श्रद्धाभाव व्यक्त गर्न सक्दैनन् । यसले गर्दा कर्मचारीप्रतिको नकारात्मक धारणा आम नागरिक बृतमा बढ्दै गएको छ । यसको पछाडि कर्मचारीको कमी कमजोरी र उनिहरुले सेवाभावमा प्रमाणित गर्न नसकेको विश्वास एउटा पाटो हो भने अर्को पाटो भनेको भएगरेका राम्रा र असल कर्महरुलाई आम नागरिक समक्ष जोड्न नसक्नु पनि हो । तर पछिल्लो समयमा कतिपय यस्ता कर्मचारीहरु पनि छन् जो आफ्नो जागिरे अभिभारा भन्दा कयौं गुणा बढि जनसेवामा खटिरहेका छन् । यस्ता सेवाकर्मी कर्मचारीको खोजी गर्ने र उनिहरुलाई जनसेवामा अझ प्रोत्साहन गर्ने उदेश्यले अकाउन्टविलिटी ल्याब नेपालले विगत केहि वर्ष देखि निरन्तर रुपमा निष्ठावान कर्मचारकिो खोजी गर्दै उनिहरुलाई सम्मान गर्ने अभ्यासको शुरुवात गरेको छ । यहि कार्य अन्तर्गत सन् २०२० का पाँच उत्कृष्ट कर्मचारीको छनौट गरी उनिहरुलाई सम्मान समेत गरिएको छ ।
इन्टेग्रीटी आईकन नाम दिइने सम्मानित कर्मचारीको छनौट निष्पक्ष, खुल्ला र पारदर्शी तरिकाले गरिने हुदा उनीहरु निष्ठावान र सेवामा सर्मित उदाहरणिय व्यक्ति भएको आयोजक संस्थाले जनाएको छ । सार्वजनिक सेवामा रहेर निष्ठापूर्वक जिम्मेवारी वहन गरी उदाहरण प्रस्तुत गर्ने कर्मचारीलाई प्रोत्साहन गर्ने र निष्ठापूर्ण समुदाय निर्माण गर्न थलिएको यो अभियान नेपालमा ७ वर्ष अगाडी सुरु भएको गरिएको थियो। हाल विश्वका १२ मुलुकमा पुगिसकेको छ ।
यस वर्षका इन्टेग्रीटी आईकनहरूलाई देशभरीबाट प्राप्त भएका १५०२ मनोनयनबाट निर्णयक समितिले छनौट गरेका थिए । निर्णायक समितिमा अख्तियार दुरुपयोग अनुसन्धान आयोगका पूर्व प्रमुख आयुक्त सुर्यनाथ उपाध्याय, अधिकार सम्पन्न संघीय प्रशासनिक पुनः संरचना सहजिकरण समितिका अध्यक्ष एवम् प्रशासनविद् काशिराज दाहाल, पुर्व सचिव जीवनप्रभा लामा, नेपाल प्रशासनिक प्रशिक्षण प्रतिष्ठानका पूर्व कार्यकारी निर्देशक पुण्य प्रसाद न्यौपाने र आइआइडिएस सेन्टर पफ्र गभर्नेन्सका निर्देशक सुचिता प्याकुरेल रहनु भएको थियो ।
इन्टेग्रीटी आइकन २०२० का लागि छनौट भएका यी पाँच निष्ठान कर्मचारीले के गरेका थिए त ? यहाँ उनिहरुको संक्षिप्त विवरण प्रस्तुत गरिएको छ ।
आरती थारु,जनस्वास्थ्यनिरीक्षक, नेपालगञ्ज स्वास्थ्यचौकी
प्युठान जस्तो विकट ठाउँमा कार्यरत हुँदा उहाँले सुत्केरी महिलाका लागि गरेको काम उल्लेखनिय छ । उहाँले त्यहाँ रहँदा, सुत्केरी सेवा सबैको पहुँचमा पुर्याउन बर्थिङ सेन्टर सबैको पायक पर्ने ठाउँमा राख्न अग्रणी भुमिका निर्वाह गर्नुभयो । हाल नेपालगञ्जमा रहँदा कोभिड – १९ महामारीको समयमा उहाँले क्वारेन्टाईनमा काम गर्दा देखाएको सहास, आईसोलेशन र होम आईसोलेशनमा बस्ने संक्रमितलाई गरेको सेवाको सबैले प्रसंशा गरेका छन् ।
भिडियो हेर्नुहोस:
दिपक ज्ञवाली,महाशाखाप्रमुख, उद्योग, पर्यटन, वन तथा वातावरण मन्त्रालय, लुम्विनी प्रदेश, बुटवल
दिपक ज्ञवालीले वनलाई आयस्रोतको माध्यम बनाउन सकिन्छ, अतिक्रमित वन राज्यको नाममा फिर्ता गर्न जोखिमको सामना गर्न सक्नु पर्दछ र समुदाय र विशेष गरेर महिला समुह परिचालन गरेर तस्करीलाई निरुत्साहन गर्न सकिन्छ भनेर उदाहरण प्रस्तुत गर्नुभएको छ । टिम वर्कमा विश्वास गर्ने र जिम्मेवारी बाँडफाँड गरेर काम गर्ने भएकोले उहाँ कार्यरत कार्यालयले उत्कृष्ट कार्य सम्पादन गर्दै आईरहेका छन् ।
भिडियो हेर्नुहोस:
हेम बहादुर आले मगर, बाली संरक्षण अधिकृत, कृषि ज्ञान केन्द्र, ओखलढुंगा
हेम बहादुर आले मगरले कृषकलाई दिगो व्यवसायिक खेती गर्ने तालिम दिन फर्म स्कुल सञ्चालनमा ल्याउनुभयो । त्यसबाट कृषकले खेती गर्ने तरिका र प्रविधिको उचित प्रयोग गरेर आय आर्जन गर्न सके । त्यसैगरि, कृषकको समस्या बुझेर समाधान गर्नका निम्ति अगुवा कृषक गोष्ठिको आयोजना गरे । उहाँले वास्तविक कृषकको पहिचान गरेर प्रभावकारी स्रोत परिचालन गर्नमा पनि उल्लेख्य काम गर्नुभयो ।
भिडियो यहाँ हेर्नुहोस् ।
४- मञ्जु महत, अधिकृत, महिला, बालबालिका तथा ज्येष्ठ नागरिक शाखा, मंगलसेन नगरपालिका, अछाम
मञ्जु महतले अछाममा घरेलु हिँसा र छाउपडी प्रथा कम गर्न र बालबालिकाको नेतृत्व विकास गर्नमा ठुलो योगदान गर्नुभएको छ । यदि कुनै महिलाले घरेलु हिँसाको सामना गरिन भने सबैले पहिलो पटक सम्झिने नाम हो मञ्जु महत । पहिला वस्तु स्थीती बुझ्ने, व्यवहारिक कार्ययोजना बनाउने र त्यसको प्रभावकारी कार्यान्वयन गर्नु उहाँको कार्यशैली हो ।
भिडियो यहाँ हेर्नुहोस् ।
डा. नविनबन्धु पहाडी, शिक्षक, नीलकण्ठ उच्चमाध्यामीक विद्यालय, धादिङ
पहाडीले धादिङमा दलित र सिमान्तकृत समुदायका बालबालिकाको पढ्न पाउने अधिकारको सुनिश्चितता गर्न राष्ट्रिय तथा अन्तरराष्ट्रि व्यक्ति तथा संस्थासँगको सहकार्यमा विद्यालय स्थापना गर्न नेतृत्वदायी भुमिका निर्वाह गर्नुभएको छ । त्यसै गरेर आमाबाबु गुमाएका बालबालिका अभावका कारण पढाईबाट बञ्चित नहोउन भन्नका लागि बाल अनाथाश्रम पनि सञ्चालन गर्नुभएको छ ।
भिडियो हेर्नुहोस :
