सन्दीपलाई हत्कडी लगाएर गौशाला प्रहरी वृतमा लगियो
- Netizen Nepal
- बिहीबार, २० असोज, २०७९- १२:२१:००/ Thursday 10-06-22
नेटिजन सम्बाददाता
काठमाडौं, २० अशोज। एक युवतीलाई जबर्जस्ती करणीको आरोप लगेका क्रिकेटको राष्ट्रिय टोलीका निलम्बित कप्तान सन्दीप लामिछानेलाई प्रहरीले त्रिभुवन अन्तर्राष्ट्रिय विमानस्थलबाट नियन्त्रणमा लिएको छ । कतार एयरवेजको विमानबाट बिहीबार (आज) बिहान त्रिभुवन अन्तर्राष्ट्रिय विमानस्थलमा ओर्लिए लगत्तै उनलाई नियन्त्रणमा लिइएको प्रहरीले जनाएको छ । आफू आज स्वदेश फर्किन लागेको जानकारी उहाँले सामाजिक सञ्जालमार्फत दिनुभएको थियो ।
त्रिभुवन अन्तर्राष्ट्रिय विमानस्थलमा बिहान १० बजे ओर्लिने भए पनि खराब मौसमका कारण विमान अवतरण गर्न नसक्दा केही बेर ढिलाइ भएको थियो । कालो मास्क, कालो क्याप र सेतो ट्र्याकसुटमा रहेका सन्दीपलाई प्रहरीले हत्कडी लगाएको छ । सन्दीपले आफूले आत्मसमर्पण गर्न लागेकाले हतकडी नलगाइदिन प्रहरीलाई आग्रह गरे पनि हत्कडी लगाएर विमानस्थलबाट प्रहरी भ्यानमा राखी प्रहरी वृत्त गौशाला लगिएको छ ।
लामिछानेविरूद्ध गत भदौ २१ गते एक बालिकालाई बलात्कार आरोपमा जाहेरी परेको थियो ।