काठमाडौं । नेपालस्थित गणतन्त्र कोरियाली दूतावासले शनिबार काठमाडौंको छाया सेन्टरमा ‘२०२६ के–भाइब महोत्सव : सौन्दर्यता र स्वाद (ग्लो एण्ड टेस्ट)’ भव्य रूपमा आयोजना गरेको छ। महोत्सवले कोरियाली सौन्दर्य, संस्कृति, संगीत तथा खानाका परिकारलाई एकै थलोमा प्रस्तुत गर्दै नेपाली युवापुस्तालाई कोरियाली जीवनशैली नजिकबाट अनुभव गर्ने अवसर प्रदान गरेको छ।

कार्यक्रममा आठ वटा लोकप्रिय कोरियाली कस्मेटिक ब्रान्डका स्टल, काठमाडौंस्थित कोरियाली रेस्टुरेन्ट एसोसिएसन अन्तर्गतका छ वटा भोजन स्टल तथा कोरियाली सरकारी संस्थाहरू कोइका, कोपिया सेन्टर, ईपीएस सेन्टर लगायतको सहभागिता रहेको थियो। सहभागीहरूले कोरियाली परिकारको स्वाद लिनुका साथै विविध मनोरञ्जनात्मक तथा सांस्कृतिक गतिविधिमा सहभागी हुने अवसर प्राप्त गरेका थिए।

महोत्सवलाई सम्बोधन गर्दै नेपालका लागि गणतन्त्र कोरियाका राजदूत पार्क थेयङले के–ब्युटी, के–पप र अन्य सांस्कृतिक प्रस्तुतिहरूलाई एकै मञ्चमा समेटिएको कार्यक्रमलाई नेपाल–कोरिया सांस्कृतिक सम्बन्ध सुदृढ गर्ने महत्वपूर्ण अवसरका रूपमा वर्णन गरे। उनले यस्ता कार्यक्रमहरूले नेपाली युवाहरूलाई आफ्नो मौलिक पहिचान र संस्कृतिको संरक्षण गर्दै विश्वव्यापी सांस्कृतिक प्रवृत्तिसँग जोडिन प्रेरित गर्ने विश्वास व्यक्त गरे।

राजदूत पार्कले नेपालमा कोरियाली संस्कृतिप्रतिको आकर्षण निरन्तर बढ्दै गएको उल्लेख गर्दै नेपाल र कोरियाबीच रहेका सांस्कृतिक समानताहरूले दुई देशका जनताबीचको सम्बन्धलाई अझ नजिक बनाएको बताए। उनले के–ब्युटी, के–पप तथा कोरियाली खानाका परिकारलाई एकै स्थानमा अनुभव गर्न पाउनु कार्यक्रमको विशेष आकर्षण रहेको उल्लेख गरे।

दूतावासका अनुसार उक्त महोत्सव कोरियाली सरकारको ‘के–भाइब’ सांस्कृतिक अभियानअन्तर्गत नेपाल–कोरिया जनस्तरीय सम्बन्ध विस्तार गर्ने उद्देश्यले आयोजना गरिएको हो। कार्यक्रममा के–ब्युटी प्रदर्शनी, के–पप प्रस्तुति, के–फूड अनुभव, फोटो बुथ, कोरियाली हाजिरीजवाफ प्रतियोगिता तथा परम्परागत कोरियाली पोशाक ‘हानबोक’ लगाएर फोटो खिच्ने अवसरसमेत उपलब्ध गराइएको थियो।

महोत्सवमा सहभागी के–सौन्दर्यप्रेमीहरूले छाला हेरचाहसम्बन्धी विशेषज्ञ परामर्श, के–मेकअप कक्षा तथा आधुनिक कोरियाली सौन्दर्य प्रविधिबारे प्रत्यक्ष जानकारी प्राप्त गरेका थिए। आयोजकका अनुसार कार्यक्रमले नेपाली युवापुस्तामाझ कोरियाली संस्कृति, सौन्दर्य तथा जीवनशैलीप्रतिको बढ्दो रुचिलाई थप प्रोत्साहन दिएको छ।

नेपालस्थित गणतन्त्र कोरियाली दूतावासले हरेक वर्ष विविध आकर्षक सांस्कृतिक कार्यक्रममार्फत नेपाल–कोरिया जनस्तरीय सम्बन्ध सुदृढ बनाउन सक्रिय भूमिका निर्वाह गर्दै आएको छ। यसै क्रममा आयोजित ‘२०२६ के–भाइब महोत्सव: चमक तथा स्वाद’ ले दुई देशबीचको जीवन्त सांस्कृतिक साझेदारीलाई थप उचाइमा पुर्‍याउँदै सम्बन्धको अर्को सफल अध्याय थपेको छ।

महोत्सवले कोरिया र नेपालको सौन्दर्य, परम्परा तथा सांस्कृतिक विविधताको अनुभव आदानप्रदान गर्ने महत्वपूर्ण अवसर प्रदान गरेको छ। यस्ता कार्यक्रममार्फत दुई देशका नागरिकबीच आपसी समझदारी, मित्रता र सांस्कृतिक निकटता अझ प्रगाढ बन्दै गएको छ।

दूतावासद्वारा प्रभावकारी रूपमा प्रचारप्रसार गरिएको उक्त कार्यक्रममा आम नागरिक, विभिन्न क्षेत्रका सरोकारवाला तथा सञ्चारकर्मीहरूको उल्लेखनीय सहभागिता रहेको थियो। कार्यक्रममा २,३०० भन्दा बढी युवाको उत्साहजनक उपस्थितिले महोत्सवलाई ऊर्जा, उल्लास र ऐतिहासिक महत्व प्रदान गरेको आयोजकले जनाएको छ।