काठमाडौं। मोबाइल प्रयोगकर्ताबीच चार्जिङसम्बन्धी विभिन्न भ्रमहरू व्याप्त छन्। अत्यधिक चार्ज गर्दा ब्याट्री पड्किने, मोबाइल शून्य प्रतिशतमा झारेर मात्र चार्ज गर्नुपर्ने, र अरूको चार्जरले ब्याट्री बिग्रिनेजस्ता मान्यताहरू अझै पनि धेरै मानिसहरूका बीचमा छन्। तर, यस्ता धेरै भ्रमहरू पूर्ण रूपमा गलत छन्। प्राविधिक विशेषज्ञहरूको सुझाव र तथ्यहरूका आधारमा मोबाइल ब्याट्री चार्जिङबारेका केही यथार्थ जानकारी यहाँ प्रस्तुत गरिएको छ।

१. फास्ट चार्जरले ब्याट्री बिगार्दैन

धेरै प्रयोगकर्ताले फास्ट चार्जरले मोबाइल ब्याट्रीलाई हानि पुर्‍याउँछ भन्ने विश्वास राख्छन्। तर, यो सत्य होइन। आधुनिक स्मार्टफोनहरूमा ब्याट्रीलाई सुरक्षित राख्ने प्रविधि प्रयोग गरिन्छ।

मोबाइल शत-प्रतिशत चार्ज भएपछि ब्याट्रीमा थप चार्ज जान बन्द हुन्छ। निर्माताहरूले यस्तो प्रविधि प्रयोग गरेका छन्, जसले ओभरचार्ज हुनबाट मोबाइललाई जोगाउँछ। त्यसैले, फास्ट चार्जर प्रयोग गर्दा कुनै समस्या हुँदैन।

२. ब्याट्रीलाई शून्यमा नझारौं

धेरैले मोबाइलको ब्याट्री शून्यमा झारेर मात्र चार्ज गर्ने बानी बनाएका हुन्छन्। तर, यस्तो बानीले ब्याट्रीको रसायनिक संरचनामा नकारात्मक असर पुर्‍याउँछ र यसको आयु घटाउँछ। विशेषज्ञहरूका अनुसार ब्याट्रीलाई ३० प्रतिशतभन्दा तल झार्नुहुंदैन। ३०-८० प्रतिशतको चार्जिङ सीमा ब्याट्रीको दीर्घायुका लागि उपयुक्त मानिन्छ।

३. अरूको चार्जर सुरक्षित हो?

अरूको चार्जर प्रयोग गर्दा ब्याट्री बिग्रिन्छ भन्ने धारणा गलत हो। यदि चार्जर प्रमाणित र राम्रो अवस्थामा छ भने, अरूको चार्जरले ब्याट्रीलाई कुनै नोक्सानी पुर्‍याउँदैन। तर, फरक चार्जरको पावर आउटपुटका कारण चार्जिङको गति ढिलो हुनसक्छ। त्यसैले, सकेसम्म आफ्नै चार्जर प्रयोग गर्नु नै उत्तम हुन्छ।

४. अत्यधिक तापक्रमबाट जोगाऔं

मोबाइल ब्याट्रीका लागि अत्यधिक तापक्रम सबैभन्दा ठूलो शत्रु हो। घामको प्रत्यक्ष सम्पर्क वा धेरै तातो स्थानमा मोबाइल राख्दा ब्याट्रीको क्षमतामा गम्भीर असर पर्न सक्छ। यसकारण, मोबाइललाई अत्यधिक घाम वा गर्मीबाट टाढा राख्नुपर्छ।

मोबाइल चार्जिङसम्बन्धी धेरै भ्रमहरू छन्, तर विज्ञान र प्राविधिक तथ्यहरूलाई ध्यानमा राखेर चार्जिङ गरे ब्याट्रीको आयु लामो बनाउन सकिन्छ। फास्ट चार्जर, अरूको चार्जर, वा शून्यमा झारेर चार्ज गर्ने बानीहरूका सन्दर्भमा सन्तुलित र सही जानकारी अपनाउनु नै सबैभन्दा राम्रो उपाय हो।