सफा हिमाल अभियान : सेनाले २ शव र ८ हजार किलो फोहर उठायो
-
नेटिजन संवाददाता
- शुक्रबार, ४ जेठ, २०८१- १०:५०:००/ Friday 05-17-24
![](https://netizennepal.com/uploads/news/images/sagarmatha-base-camp2022-06-17-11-28-01.jpeg)
काठमाडौँ । गत चैत २९ गतेबाट नेपाली सेनाको अगुवाइमा सञ्चालन भइरहेको सफा हिमाल अभियानमा सहभागी टोलीले सगरमाथाको क्याम्प ४ बाट १ र ल्होत्से हिमालको शिखर नजिकबाट १ जनाको शव निकालेको छ ।
सो क्षेत्रको लोलापास फेदी इलाकाबाट मानव अस्थिपञ्जर सङ्कलन गरी हवाई साधनमार्फत त्रिवि शिक्षण अस्पताल, महाराजगञ्जमा ल्याइएको नेपाली सेनाको सैनिक जनसम्पर्क तथा सूचना निर्देशनालयले जानकारी दिएको छ ।
निर्देशनालयले सोही अभियानका दौरान हालसम्म ८ हजार ६२० किलो फोहर सङ्कलन गरी त्यसमध्ये २ सय ५० किलो कुहिने फोहर सगरमाथा प्रदूषण नियन्त्रण समितिलाई हस्तान्तरण गरेको आज जानकारी गराएको छ ।
यस वर्षको सफा हिमाल अभियानअन्तर्गत सगरमाथा, ल्होत्से र नुप्त्से हिमालबाट १० टन फोहर तथा ५ वटा मानव शव सङ्कलन तथा व्यवस्थापन गर्ने योजना रहेको सेनाले जनाएको छ । सेनाले जैविक विविधता तथा पर्यावरण संरक्षण गर्ने उद्देश्यले सफा हिमाल अभियान सञ्चालन गर्दै आएको छ ।रासस ।