काठमाडौं। नेपाल प्रिमियर लिग (एनपीएल) अन्तर्गत आज दुई खेल हुने हुनेछन्। दिनको दोस्रो खेलमा कर्णाली याक्स र विराटनगर किंग्स आमनेसामने हुनेछन्।

यो प्रतिस्पर्धा कीर्तिपुरस्थित त्रिवि क्रिकेट मैदानमा दिउँसो १ बजे सुरू हुने तय भएको छ। अहिले चलिरहेको एनपीएलमा कर्णाली याक्सले अहिलेसम्म तीन वटा खेल खेलिसकेको छ। तीमध्ये दुई खेलमा पराजय भोग्दा एक खेलमा मात्र जित हात परेको छ। कर्णाली, जनकपुर बोल्ट्ससँग आठ विकेटले र काठमाडौं गुर्खाजसँग तीन विकेटले पराजित भएको थियो। तर, चितवन राइनोजलाई भने ६ विकेटले पराजित गर्दै जित दर्ता गरेको थियो।

त्यस्तै, विराटनगर किंग्सले पनि तीन खेल खेलिसकेको छ। यसअघि दुई खेलमा हार बेहोरेको विराटनगरले एक खेलमा जित हासिल गरेको छ। जनकपुर बोल्ट्ससँग आठ विकेटले र सुदूरपश्चिम रोयल्ससँग ९० रनले हार व्यहोरेको विराटनगरले लुम्बिनी लायन्सलाई भने दुई विकेटले पराजित गरेको थियो।