गीता अधिकारी 

उ पछ्याउन खोजिरहेथ्यो 
म भाग्न खोजिरहें 
म दगुरिरहें  
उसले पछ्याईरह्यो 
म थाकें 
थकाई मार्न बस्दा 
उसले भेट्टायो।।

साथ हिड्न
उसले बिन्ती बिसायाे
मैले 
एक्लै हिड्न सक्ने 
अडान कसिरहें 
बसिरहें  
उ पर्खिरह्यो 
मैले पर्खाई रहें।।

म लाचार भएँ
उसलाई जित्न दिएँ 
सँगै हिड्न स्वीकार गरें 
उ खुसी भयो
म पनि खुसि भएँ 
समय चलिरह्यो 
हामी पनि चलिरह्यौं।।

बिस्तारै ...,
उ बदलिंदै गयो
म आत्तिदै गए
सोचे मेरो परिक्षा लिंदैछ 
तर होइन, 
कालान्तरमा 
मेरो अनुमान र उसको नतिजा 
बीचको
हिसाब गडबड भैसकेछ।। 

त्यसपछि ...,
उ तर्किन थाल्यो 
म फर्किन थालें 
उ झर्किन थाल्यो 
म थर्किन थालें ।।

उ भाग्न थाल्यो 
म पछ्याउन थालें 
उ भागिरह्यो 
म हेरिरहे 
आँखा थाकुन्जेल 
मन थाकुन्जेल
उ बिलायो 
म बिलौना गर्न थालें 
उ आजाद भयो 
म पिंजडामा कैद भएँ ।।