काठमाडौँ। त्रिवि अन्तर्राष्ट्रिय क्रिकेट मैदानमा जारी सिद्धार्थ बैंक नेपाल प्रिमियर लिग (एनपीएल)को आजको खेल रोमाञ्चक मात्र होइन, ऐतिहासिक पनि बन्यो। यसअघिका दुई खेलमा लज्जास्पद हार बेहोरेको लिगको महँगो टिम पोखरा एभेन्जर्सले लुम्बिनी लायन्सलाई एकतर्फी ढंगले हरायो। खेलमा पोखराले न केवल जित दर्ता गर्‍यो, तर यस क्रममा धेरै कीर्तिमानी उपलब्धिहरू पनि हात पार्‍यो।

पहिले ब्याटिङ गरेको लुम्बिनीले १७१ रनको चुनौतीपूर्ण लक्ष्य प्रस्तुत गरे पनि पोखराले १६.५ ओभरमै कुनै विकेट नगुमाई लक्ष्य पूरा गर्दै सबैलाई चकित बनायो। यहाँ आजको खेलमा बनेका पाँच प्रमुख रेकर्डहरूको चर्चा गरिएको छ।

१. लिगकै सबैभन्दा ठूलो साझेदारी

पोखरा एभेन्जर्सका ओपनर आन्द्रे गौस र दिनेश खरेलले पहिलो विकेटका लागि १७६ रनको अपराजित साझेदारी गर्दै लिगको अहिलेसम्मकै सबैभन्दा ठूलो साझेदारीको रेकर्ड बनाए। गौसले ५४ बलमा १२ चौका र पाँच छक्का प्रहार गर्दै नटआउट १०४ रन बनाएका थिए। उनको साथ दिने क्रममा खरेलले ४६ बलमा चार चौका र चार छक्कासहित नटआउट ६१ रनको योगदान दिए। यसअघि जनकपुर बोल्ट्सका अनिल शाह र आसिफ शेखले कर्णाली याक्सविरुद्ध पहिलो विकेटका लागि ८४ रनको साझेदारी गरेका थिए।

२. सबैभन्दा छिटो अर्धशतक

पोखराका आन्द्रे गौसले लिगकै सबैभन्दा छिटो अर्धशतक प्रहार गर्ने कीर्तिमान बनाएका छन्। उनले मात्र २० बलमा अर्धशतक पूरा गर्दै सुदूरपश्चिमका कप्तान दीपेन्द्र सिंह ऐरीको २३ बलमा अर्धशतक बनाउने रेकर्डलाई तोडे।

३. एनपीएलको पहिलो शतक

आजको खेलले लिगमा पहिलो शतकसमेत पस्कियो। आन्द्रे गौसले ५४ बलमा १२ चौका र पाँच छक्काको मद्दतले अविजित १०४ रन बनाउँदै शतक प्रहार गरे। यसअघि लुम्बिनीका कप्तान रोहितकुमार पौडेलले ९५ रन बनाउँदै सबैभन्दा धेरै रन बनाउने कीर्तिमान राखेका थिए।

४. शतक र अर्धशतक एउटै खेलमा

लिगमा पहिलो पटक एउटै खेलमा शतक र अर्धशतक दुवै बनेका छन्। गौसले शतक बनाउँदा खरेलले ६१ रनको अर्धशतकीय इनिङ्स खेल्दै इतिहास रचे।

५. १० विकेटको फराकिलो जित

१७१ रनको विशाल लक्ष्य कुनै विकेट नगुमाइ १६.५ ओभरमै पूरा गरेर पोखराले लिगकै सबैभन्दा फराकिलो जित दर्ता गर्‍यो। यसअघि जनकपुर बोल्ट्सले कर्णाली याक्सलाई ८ विकेटले हराउँदै ठूलो जित निकालेको थियो।
यो खेल न केवल पोखराका लागि पुनरागमनको संकेत बन्यो, तर लुम्बिनीमाथिको यो प्रदर्शन एनपीएलको इतिहासमै स्मरणीय हुनेछ। पाँच नयाँ रेकर्डसँगै पोखराले आफ्नो साख बचाउँदै लिगलाई थप प्रतिस्पर्धात्मक बनाएको छ।