काठमाडौं। डोनाल्ड ट्रम्प अमेरिकाको ४७औं राष्ट्रपति चुनिएका छन् र उनी आउँदो जनवरीको अन्त्यसम्ममा पदभार ग्रहण गर्नेछन्। यो जितका पछाडि थुप्रै कारणहरू छन्, तर सबैभन्दा चासोको विषय भने विश्वकै धनी व्यक्ति एलन मस्कको योगदान हो। मस्कले ट्रम्पको पक्षमा चुनावी अभियान चलाउन अथाह पैसा खर्च गरे। विशेषगरी, निर्णायक मानिने पेन्सिलभेनिया राज्यमा मस्कले व्यक्तिगत रूपमा सक्रिय भई प्रचार गरे। दिनहुँ, लक्की ड्रमार्फत एक समर्थकलाई १० लाख डलरको पुरस्कार दिने योजना ल्याएर मतदाताहरूलाई आकर्षित गरे। मस्कले आफ्नो स्वामित्वमा रहेको सामाजिक सञ्जाल प्लेटफर्म एक्स (पूर्व ट्विटर) लाई पनि ट्रम्पको फाइदामा प्रयोग गरेका थिए।

चुनावी खर्च कति थियो?

मस्कले ट्रम्पलाई जिताउन ठ्याक्कै कति रकम खर्च गरे भन्नेबारे स्पष्ट विवरण नभए पनि, द न्युयोर्क टाइम्स का अनुसार, चुनाव प्रचारका लागि मस्कले झन्डै २५ करोड डलर (३४ अर्ब रुपैयाँ) खर्च गरे। अमेरिकामा चुनावी अभियानका लागि 'पोलिटिकल एक्सन कमिटी' (प्याक) भनिने संस्थाहरूलाई आर्थिक सहयोग गरिन्छ। यी संस्थाहरूलाई कर छुट हुने प्रावधान छ।

ट्रम्पको प्रचारका लागि काम गर्ने प्याक संस्थाहरूलाई मस्कले बारम्बार ठूला रकम सहयोग गरेका थिए। संघीय चुनाव आयोगको रिपोर्टअनुसार, मस्कले ट्रम्प समर्थक मुख्य संस्था अमेरिका प्याक लाई चुनावको अन्तिम सातामा मात्रै ७५ लाख डलरका तीन चेक दिएका थिए।

अरू कहाँ खर्च भयो?

न्युयोर्क टाइम्सको रिपोर्टअनुसार, मस्कले संविधान समर्थनका लागि हस्ताक्षर अभियान चलाए। यस अभियानमा सहभागीमध्ये एकजनालाई १० लाख डलरको पुरस्कार दिने योजनामा मात्र उनले ४ करोड डलर खर्च गरे। चुनाव सकिएपछि पनि मस्कले ट्रम्प समर्थक विभिन्न संस्थाहरूसँग निरन्तर सहयोग गरेका छन्।

मस्कको लागि ट्रम्पको खास उपहार

राष्ट्रपतिमा निर्वाचित भएपछि ट्रम्पले मस्कलाई ह्वाइट हाउसमा विशेष जिम्मेवारी दिएका छन्। डिपार्टमेन्ट अफ गभर्नमेन्ट इफिसियन्सी नामको नयाँ विभाग मस्कको लागि स्थापना गरिएको छ। यो विभागले संघीय प्रशासनलाई थप प्रभावकारी बनाउन, कर्मचारीतन्त्रलाई सुव्यवस्थित गर्न, अनावश्यक खर्च घटाउन, र संघीय एजेन्सीहरूको पुनर्संरचना गर्न काम गर्नेछ। मस्कसँगै विवेक रामास्वामीलाई पनि यस विभागमा महत्वपूर्ण भूमिका दिइएको छ।

मस्कको भूमिका विवादको केन्द्रमा

चुनावी अभियानमा खर्चिएका रकम र मस्कको सक्रियताले अमेरिकामा नयाँ बहसको सिर्जना गरेको छ। यद्यपि, ट्रम्पको जितसँगै मस्कले आफूले गरेको प्रयास सफल भएको बताएका छन्।

ट्रम्पलाई सघाएर मस्कले अमेरिकी राजनीति र प्रशासनमा आफ्नो प्रभाव विस्तार गरेका छन्। अब हेर्न बाँकी छ, यी दुईबीचको सहकार्यले अमेरिकाको भविष्यलाई कस्तो मोड दिनेछ।