काठमाडौँ । कहिलेकाहीँ आधिकारिक डकुमेन्टमा हस्ताक्षर गरेर पठाउनुपर्ने अवस्थामा हामी पर्न सक्छौं । विगतमा यो काम गर्नका लागि कागजमा प्रिन्ट गरेर, भौतिक रूपमा हस्ताक्षर गरी पुनः स्क्यान गरेर पठाउनुपर्ने झन्झट थियो । तर, प्राविधिक विकाससँगै अहिले यस्तो झन्झट बेहोर्नुपर्ने आवश्यकता छैन ।

अब विद्युतीय उपकरणकै प्रयोगबाट सजिलै पीडीएफ फाइलमा हस्ताक्षर राख्न सकिन्छ । यो सुविधा उपलब्ध गराउने धेरै उपकरण तथा सफ्टवेयरहरू बजारमा छन् । तीमध्ये धेरैले एडोबी एक्रोब्याट रिडर (Adobe Acrobat Reader) नामक लोकप्रिय सफ्टवेयर प्रयोग गर्छन् ।

एडोबी एक्रोब्याटको मोबाइल एपमार्फत नि:शुल्क रूपमा पीडीएफमा हस्ताक्षर गर्न सकिन्छ । यो एप एन्ड्रोइड र आईओएस दुवै प्लेटफर्ममा उपलब्ध छ । यद्यपि, डेस्कटप भर्सन प्रयोग गर्दा केही शुल्क लाग्न सक्छ । तर, अनलाइन टुल प्रयोग गरी नि:शुल्क रूपमा यो काम गर्न सकिन्छ ।

पीडीएफ फाइलमा हस्ताक्षर गर्ने विधि:

1.एप डाउनलोड गर्नुहोस् , सबैभन्दा पहिले, एडोबी एक्रोब्याट रिडर एप आफ्नो मोबाइलमा डाउनलोड गर्नुहोस् ।

2.पीडीएफ फाइल खोल्नुहोस्, हस्ताक्षर गर्नुपर्ने फाइल एपमा खोलेर तयार गर्नुहोस् ।

3.‘फिल एन्ड साइन’ विकल्पमा जानुहोस्, एपमा रहेको तल्लो टुलबारमा ‘फिल एन्ड साइन’ भन्ने विकल्पमा ट्याप गर्नुहोस् । त्यसपछि, कलम जस्तो आइकनमा क्लिक गरी ‘एड सिग्नेचर’मा ट्याप गर्नुहोस् । यहाँ तपाईंले दुई तरिका अपनाउन सक्नुहुन्छ:

- हातले वा स्टाइलसको सहायताले प्रत्यक्ष रूपमा हस्ताक्षर बनाउने ।
- पहिले कागजमा गरिएको हस्ताक्षरको फोटो खिचेर अपलोड गर्ने ।
- हस्ताक्षर राखेर ‘डन’मा क्लिक गर्नुहोस्
- अन्त्यमा, ‘डन’मा ट्याप गरी हस्ताक्षरलाई आवश्यक ठाउँमा राख्नुहोस् ।

अनलाइन टुलको प्रयोग:
यदि मोबाइलमा स्टोरेजको समस्या छ भने अनलाइन टुलहरू प्रयोग गर्न सक्नुहुन्छ । आई लभ पीडीएफ, स्मल पीडीएफ, र एडोबी जस्ता वेबसाइटहरूले नि:शुल्क रूपमा यो सेवा उपलब्ध गराउँछन् ।

अब कुनै पनि आधिकारिक कागजातमा हस्ताक्षर गर्नका लागि प्रिन्ट, स्क्यान, वा फोटोकपीको झन्झट नगरी सजिलै डिजिटल माध्यमबाट काम गर्न सक्नुहुन्छ । यो विधि सहज, छिटो र विश्वासिलो छ, जसले तपाईंको समय र श्रम दुवै बचत गर्दछ ।