मनसुन देशभर फैलियो
-
नेटिजन संवाददाता
- मंगलबार, ११ असार, २०८१- ११:३०:००/ Tuesday 06-25-24
![](https://netizennepal.com/uploads/news/images/raining2022-01-20-11-07-30.jpeg)
काठमाडौँ। यस वर्षको मनसुन प्रणाली देशभर फैलिएको जल तथा मौसम विज्ञान विभाग, मौसम पूर्वानुमान महाशाखाले जनाएको छ । मनसुन देशभर फैलिए पनि यो कमजोर प्रकृतिको छ ।
हाल कोशी, बागमती, गण्डकी र लुम्बिनी प्रदेशमा मेघ गर्जन/चट्याङसहित हल्कादेखि मध्यम वर्षा भइरहेको छ । ती प्रदेशका १-२ स्थानमा भारी वर्षाको सम्भावना रहेको छ ।
नेपालमा यस वर्षको मनसुन औसत मितिभन्दा ३ दिन छिटो गरी गत जेठ २८ गते (१० जुन २०२४) कोशी प्रदेशको पूर्वी भागमा प्रवेश भएको थियो । यस वर्ष नेपालभर मनसुन फैलिन १५ दिन लागेको महाशाखाले उल्लेख गरेको छ ।
साथै असार ६ गते कोशी प्रदेशका बाँकी भूभाग, मधेस, बागमती, गण्डकी प्रदेशका अधिकांश भू-भागमा र लुम्बिनी प्रदेशका पूर्वी भूभागमा आगमन भएको थियो ।