नेपाल प्रिमियर लिग (एनपीएल) क्रिकेटको विजेताले नगद १ करोड १० लाख रुपैयाँ पाउने भएको छ। नेपाल क्रिकेट संघ (क्यान)ले मंगलबार पुरस्कार राशि सार्वजनिक गर्दै उपविजेतालाई ५१ लाख, तेस्रो स्थानलाई २५ लाख र चौथो स्थानलाई १५ लाख रुपैयाँ प्रदान गरिने जानकारी दिएको हो।

जारी एनपीएलको समूह चरण सकिएको छ, जहाँ सुदूरपश्चिम रोयल्स, जनकपुर बोल्ट्स, चितवन राइनोज र कर्णाली याक्सले प्लेअफमा स्थान पक्का गरेका छन्।

प्लेअफ अन्तर्गत बुधबारको एलिमिनेटर खेलमा चितवन र कर्णाली आमनेसामने हुनेछन्। पहिलो क्वालिफायरमा सुदूरपश्चिम र जनकपुर भिड्ने छन्। पहिलो क्वालिफायरको विजेता टोली सोझै फाइनलमा पुग्नेछ भने पराजित टोलीले दोस्रो क्वालिफायरमा इलिमिनेटरको विजेता टोलीसँग भिड्नुपर्नेछ।