काठमाडौं। अर्बपति एलन मस्कको टेस्ला कम्पनीले काठमाडौंमा स्मार्टफोन सार्वजनिक गर्न लागेको भन्दै केही फेसबुक पेजहरूले गलत जानकारी फैलाएका छन्। टेस्ला फोन ४० हजार रुपैयाँमा उपलब्ध हुने, चार्ज गर्नु नपर्ने र निःशुल्क इन्टरनेट दिने दाबी गरिएको छ। नेपाल तथ्यजाँचले यी दाबीहरू भ्रामक रहेको पुष्टि गरेको छ।

केही  फेसबुक पेजहरूले मस्कले टेस्ला फोन काठमाडौंमा ल्याउन लागेको भन्दै प्रचार गरेका थिए। यी पोस्टहरूले हजारौं प्रतिक्रिया  पाएका छन्। यद्यपि, टेस्लाको आधिकारिक वेबसाइट, मस्कको एक्स ह्यान्डल, र विश्वसनीय स्रोतहरूले यस्ता फोनको घोषणा नभएको स्पष्ट पारेका छन्।

स्मार्टफोन विकासको चर्चा यसअघि पनि भाइरल भइसकेको थियो। दक्षिण एसियाली देशमा यस्ता पोस्टहरूले भ्रम फैलाएको तथ्य विभिन्न सञ्चार माध्यमहरूले समय-समयमा खुलासा गरेका छन्। एलन मस्कले फोनबारे कुनै ठोस योजना सार्वजनिक नगरे पनि उनका धारणा र टिप्पणीकै कारण यस्ता अफवाह उत्पन्न हुने गरेको छ।

सन् २०२० मा मस्कले स्मार्टफोनलाई ‘हिजोको प्रविधि’ भनेर टिप्पणी गरेका थिए। उनले न्युरालिङ्क प्रविधिमा काम गरिरहेको र स्मार्टफोनभन्दा परको प्रविधिमा विश्वास राखेको बताएका थिए। यद्यपि, मस्कले सन् २०२२ मा एप्पल र गुगलसँग प्रतिस्पर्धा गर्न आफ्नो फोन ल्याउनुपर्ने अवस्था आए मात्रै यस्तो योजना बनाउने संकेत दिएका थिए।

हालसम्म टेस्लाले कुनै फोन निर्माण गरिरहेको स्पष्ट प्रमाण छैन। तर, केही कन्सेप्ट आर्टिस्टहरूले भविष्यमा टेस्लाले अपनाउन सक्ने फोन डिजाइन सार्वजनिक गरेका छन्। यी डिजाइनहरू टेस्लाको आधिकारिक घोषणाजस्तो प्रस्तुत गरिए पनि तिनमा कुनै आधार छैन।