काठमाडौं । हुन्डाईले हालै भारतीय बजारमा नयाँ क्रेटा ईभी सार्वजनिक गरेको छ, जुन कम्पनीका अन्य विद्युतीय मोडेलहरू जस्तै आयोनिक फाइभ र कोना ईभीपछि आएको छ। क्रेटा ईभीलाई हुन्डाईले किफायती मूल्यको विद्युतीय गाडीको रूपमा प्रस्तुत गरेको छ र यसले भारतीय र नेपाली बजारमा रहेका गाडीप्रेमीहरूको ध्यान आकर्षित गर्ने अपेक्षा गरिएको छ। खासगरी, क्रेटा एसयूभीको पारम्परिक पेट्रोल र डिजेल भर्सन भारत र नेपालमा अत्यन्त लोकप्रिय रहेको छ र यसको विद्युतीय भर्सनको आगमनले उपभोक्तालाई विद्युतीय गाडीमा शिफ्ट गर्न प्रेरित गर्न सक्छ।

भारतमा ११ लाखभन्दा बढी युनिट बिक्री भएको क्रेटा गाडीको विद्युतीय भर्सन नेपाली बजारमा आउन लागेको हो र त्यसको मूल्य लगभग ५५ लाख रुपैयाँ रहेको अनुमान गरिएको छ। यो गाडी फेब्रुअरी महिनामा नेपाली बजारमा उपलब्ध हुने अपेक्षा गरिएको छ। सुरुमा नेपाली बजारमा ४२ किलोवाट आवर ब्याट्री र ९९ किलोवाट मोटर पावर अप्सनसहितको एक मात्र भेरियन्ट उपलब्ध हुनेछ। यसबाहेक , क्रेटा ईभीको व्याट्री र मोटरका भिन्न क्षमता भएका मोडेलहरू पनि भारतमा उपलब्ध छन्।

क्रेटा ईभीको ब्याट्री क्षमता र यसको ड्राइव रेंज उल्लेखनीय छ। यसको ५१.४ किलोवाट आवर ब्याट्रीले ४७३ किमी र ४२ किलोवाट आवर ब्याट्रीले ३९० किमीको रेंज प्रदान गर्ने दावी गरिएको छ। नेपालमा शुरुमा ४२ किलोवाट आवर ब्याट्रीको मोडेल मात्र उपलब्ध हुनेछ, जुन सामान्य प्रयोगका लागि पर्याप्त र दिगो रेंज प्रदान गर्न सक्षम हुनेछ। यस गाडीमा एनएमसी (निकेल मङ्गानिज कोबाल्ट) ब्याट्री प्रयोग गरिएको छ, जसको पानी , धूलो र अत्यधिक चिसोमा पनि राम्रो प्रदर्शन गर्ने क्षमतामा विश्वसनीयता छ। यसमा समावेश गरिएको ब्याट्री हिटर प्रविधिले -३५ डिग्री सेल्सियस जस्तो चिसो वातावरणमा पनि गाडीलाई उच्च प्रदर्शन दिन सक्षम बनाउँछ।

हुन्डाई क्रेटा ईभीको अर्को आकर्षण यसको फिचरहरू हुन्। गाडीमा पानोरामिक सनरुफ, बोस साउन्ड सिस्टम, वायरलेस फोन चार्जिङ, भेन्टिलेटेड सिट, अटोमेटिक क्लाइमेट कन्ट्रोल र डिजिटल ड्राइभर डिस्प्ले जस्ता अत्याधुनिक सुविधाहरू रहेका छन्। यसका साथै, गाडीमा अत्यधिक सुरक्षाका लागि ६ ओटा एयरब्याग, एबीएस, हिल डिसेन्ट कन्ट्रोल, र एडभान्स ड्राइभिङ असिस्टेन्ट सिस्टम (एडीएएस) लगायतका अत्याधुनिक सुरक्षा उपकरणहरू पनि राखिएका छन्, जसले यात्रालाई थप सुरक्षित र आरामदायी बनाउँछ।

गाडीको चार्जिङ क्षमताबारे पनि राम्रो दाबी गरिएको छ। ५० किलोवाट डीसी फास्ट चार्जरले गाडीलाई ५८ मिनेटमा १०% देखि ८०% सम्म चार्ज गर्न सकिन्छ। त्यस्तै, १०० किलोवाट चार्जरले भने केवल ३९ मिनेटमा ८०% सम्म चार्ज गर्न सकिन्छ। यसरी, क्रेटा ईभीलाई छिटो र सजिलै चार्ज गर्न सकिन्छ, जसले लामो यात्रामा समेत थप सुविधा दिन्छ। 

यस गाडीको सवारी अनुभव अत्यन्तै आरामदायी र स्टाइलिश छ। गाडीले १०० किमी प्रति घण्टाको गति ७.९ सेकेन्डमा पूरा गर्न सक्छ। गाडीमा रहेका सबै सुविधा र फिचरहरू गाडीलाई उच्च श्रेणीको बनाउँछन्, जुन प्रतिस्पर्धी गाडीसँग तुलना गर्दा निकै आकर्षक देखिन्छ।

नेपालमा हुन्डाई क्रेटा ईभीको आगमनले विद्युतीय गाडीको बजारलाई नयाँ दिशा दिने आशा गरिएको छ। चीनका ब्रान्डहरूबाट प्रतिस्पर्धा बढ्दै गर्दा, हुन्डाईको विश्वसनीयता र स्पेयर पार्ट्सको सहज उपलब्धता नेपाली उपभोक्तालाई आकर्षित गर्नमा मद्दत पुर्याउने निश्चित छ।