काठमाडौं। मोबाइल फोनमा नेटवर्क समस्या हुनु निकै झर्कलाग्दो कुरा हो। विशेषगरी आपतकालीन अवस्थामा कसैलाई सम्पर्क गर्न नसक्दा ठूलो समस्या निम्तिन सक्छ। तर, तपाईंले केही सामान्य उपाय अपनाएमा मोबाइलको कमजोर नेटवर्क सिग्नल सुधार गर्न सक्नुहुन्छ। यहाँ हामी मोबाइल नेटवर्क सुधार गर्न सकिने ७ प्रभावकारी उपाय प्रस्तुत गर्दैछौं।

१. एयरप्लेन मोड अन-अफ गर्नुहोस्
फोनको एयरप्लेन मोड सक्रिय (अन) गरेर केही समयपछि फेरि निष्क्रिय (अफ) गर्नुहोस्। यसले मोबाइलको नेटवर्क प्रणालीलाई पुनः रिसेट गर्न मद्दत पुर्‍याउँछ। एन्ड्रोइड फोनमा: स्क्रिनको माथिबाट तल स्वाइप गरेर एयरप्लेन मोड आइकनमा ट्याप गर्नुहोस्। आईफोनमा: स्क्रिनको माथिल्लो दायाँ कुनाबाट तल स्वाइप गरेर एयरप्लेन मोडमा ट्याप गर्नुहोस्।
 

२. फोनलाई रि-स्टार्ट गर्नुहोस्
कहिलेकाहीँ फोन रि-स्टार्ट गर्दा साना समस्या स्वतः समाधान हुन्छन्। एन्ड्रोइड फोनमा: पावर बटन थिचेर "रि-स्टार्ट" बटनमा ट्याप गर्नुहोस्। आईफोनमा: स्लीप/वेक बटन र भोल्युम बटन एकसाथ थिचेर पावर स्लाइडर स्वाइप गरी फोन रि-स्टार्ट गर्नुहोस्।
 

३. सिम कार्ड निकालेर सफा गर्नुहोस्
सिम कार्डलाई फोनबाट निकालेर सफा गर्नुहोस्। यसले सिम कार्ड र फोनको सिग्नल रिसिभ गर्ने भागमा भएका धूलो वा फोहोर हटाउन मद्दत गर्छ।
यदि सिम कार्ड खराब छ भने नयाँ सिम कार्ड प्रयोग गर्नुहोस्। ई-सिम भएका फोनहरूमा भने फोन रि-स्टार्ट गर्ने उपाय उपयोगी हुन्छ।

४. फोनको केस र कभर हटाउनुहोस्
गह्रौं र बाक्लो केसले फोनको एण्टेनाको सिग्नललाई अवरोध गर्न सक्छ। यस्तो अवस्थामा फोनको केस हटाएर प्रयोग गर्दा सिग्नल सुधार हुन सक्छ।

५. फोन चार्ज भएको सुनिश्चित गर्नुहोस्
कम ब्याट्री हुँदा फोनले सिग्नल खोज्न पर्याप्त शक्ति प्रयोग गर्न सक्दैन। त्यसैले, फोनलाई समयमै चार्ज गरेर पर्याप्त ब्याट्री भएको सुनिश्चित गर्नुहोस्।

६. नेटवर्क सेटिङ रिसेट गर्नुहोस्
यदि माथिका उपायले समस्या समाधान भएन भने, फोनको नेटवर्क सेटिङलाई रिसेट गर्नुहोस्। एन्ड्रोइड फोनमा: सेटिङ > रिसेट विकल्प > नेटवर्क सेटिङ रिसेटमा जानुहोस्। आईफोनमा: सेटिङ > ट्रान्सफर वा रिसेट आईफोन > रिसेट > नेटवर्क सेटिङ रिसेट गर्नुहोस्।
७. मोबाइल सेवा प्रदायकलाई सम्पर्क गर्नुहोस्
यदि माथिका कुनै पनि उपायले समस्या समाधान भएन भने, आफ्नो मोबाइल सेवा प्रदायकसँग सम्पर्क गर्नुहोस्। यो समस्या मोबाइल टावरमा खराबी, सिम कार्डमा समस्या, वा अन्य प्राविधिक कारणले हुन सक्छ।

यी सामान्य तरिकाहरू अपनाएर तपाईं आफ्नो मोबाइलको नेटवर्क समस्या धेरै हदसम्म सुधार गर्न सक्नुहुनेछ। यदि समस्या यथावत् रहन्छ भने, प्राविधिक सहयोग लिनु नै उत्तम हुन्छ।