एआई प्रविधिसहित सामसङका नयाँ वासिङ मेसिन नेपाली बजारमा, मूल्य कति ?
-
नेटिजन संवाददाता - आइतबार, २१ पौष, २०८१- १४:१०:००/ Sunday 01-05-25
काठमाडौं । सामसङले नेपाली बजारमा अत्याधुनिक एआई प्रविधिसहितका दुई नयाँ बिस्पोक वासिङ मेसिन सार्वजनिक गरेको छ। १२ केजी क्षमता भएका यी वासिङ मेसिनहरूले स्मार्टफोनमार्फत टाढैबाट नियन्त्रण गर्न सकिने विशेषता प्रदान गर्छन्। कम्पनीका अनुसार, नयाँ मोडेलहरूले ‘एआई इकोबबल’ प्रविधिको प्रयोग गरी लुगा धुने प्रक्रिया थप सुरक्षित र प्रभावकारी बनाउँछन्।
यी वासिङ मेसिनको प्रमुख आकर्षण भनेको कृत्रिम बुद्धिमत्ता (एआई) प्रविधि हो, जसले लुगाको प्रकार पहिचान गरी आवश्यक धुने विधि आफैं निर्धारण गर्न सक्छ। कम्पनीले जनाएको छ, १२ केजीसम्म लुगा धुने क्षमता भएकाले एकैपटक धेरै लुगा धुन सकिनेछ।
सामसङले कम ठाउँमा पनि सहजै राख्न मिल्ने डिजाइनमा विशेष ध्यान दिएको छ। यस्तै, ऊर्जा खपतलाई कम गर्ने विशेषता राख्ने यी मेसिनहरूले घरायसी विद्युत् बचतमा समेत महत्वपूर्ण योगदान पुर्याउने कम्पनीको दाबी छ।
सामसङले नेपाली बजारमा बिस्पोक वासिङ मेसिनका दुई भिन्न मोडेल प्रस्तुत गरेको छ। पहिलो मोडेल डायल कन्ट्रोलसहितको WW12DG5B24AXIM हो, जसको मूल्य १ लाख १४ हजार ९९० रुपैयाँ तोकिएको छ। दोस्रो मोडेल WW12DG6B24ABIM भने एलईडी डिस्प्लेसहित उपलब्ध छ, जसको मूल्य १ लाख २० हजार ९९० रुपैयाँ छ। यी दुबै मोडेल नेपालभर उपलब्ध सामसङका आधिकारिक विक्रेताहरूबाट किन्न सकिनेछ।
सामसङले यसअघि पनि नेपाली बजारमा विभिन्न अत्याधुनिक उपकरणहरू प्रस्तुत गर्दै आएको छ। नयाँ बिस्पोक वासिङ मेसिनको आगमनले स्मार्ट जीवनशैलीतर्फको यात्रा सहज बनाउने विश्वास लिइएको छ। ऊर्जा खपत कम गर्ने, कम समयमै धुलाई गर्ने र स्मार्टफोनमार्फत सञ्चालन गर्न मिल्ने जस्ता सुविधाहरूका कारण यी वासिङ मेसिनहरू ग्राहकका लागि आकर्षणको केन्द्र बन्ने अनुमान गरिएको छ।
कम्पनीले भविष्यमा थप नयाँ मोडेलहरू ल्याउने योजना पनि बनाएको जानकारी दिएको छ।
